2 results
Search Results
Now showing 1 - 2 of 2
- Lona umsebenzi wocwaningo ohlelwe ngokwezahluko eziyisikhombisa. Leso naleso sahluko sigxile emgomeni owodwa ogqamile ezinkondlweni zembongi ekhethelwe lolu cwaningo u-EJ Mhlanga. Isahluko 1: sendlalela ucwaningo ngokucubungulisisa izinhloso, izindlela nomhlahlo wocwaningo kanye nonJando weningi okuhlaziywa izinkondlo zayo. Kugxilwe ezinhlosweni zokucwaninga imvumelwano, ifanamsindo, ukuxhumanisa, impindamqondo nempindwa kanye nesigqi. Umkhawulo wocwaningo ugxile emaqoqweni ezinkondlo ayisithupha, okukhethwe izinkondlo ezingamashumi amane nesithupha ezihlungelwe lolu cwaningo. Kusetshenziswe izindlela zocwaningo ezimbili: indlela yemibuzo negokufundwa kwezincwadi eziqukethe imigomo yokuhluza. Isahluko 2: sithinta imvumelwano ezinkondlweni eziqokiwe. Sigqamisa izindawo izimvumelwano ezitholakala kuzona: ekuqaleni, maphakathi nasekugcineni kwemigqa yezinkondlo. Isahluko 3: kucutshungulwe ukufana kwemisindo ukusukela konkamisa, ongwaqa kuze kufinyelele kumalunga. Kuhlaziywe kabanzi ofanankamisa, fanangwaqa nefuzamsindo ekuvezeni imiqondo nemigqumo ezinkondlweni. Isahluko 4: lapha kucwaningwe ngokuxhumanisa kwagxilwa ezindaweni okwenzeka kuzona: ekuqaleni, maphakathi nasekugcineni kwemigqa yezinkondlo. Kuhlaziywe nendlela okwenzeka ngayo okuthinta ukweqa imigqa, ukuphambana, ubunxemu nokuba mazombe. Isahluko 5: siveza ukusebenza kwempindamqondo egqanyiswe ukusetshenziswa kwamagama aphindiwe ngenhloso yokuletha Umgqumo ezinkondlweni. Impindwa ivuzwe ukuphindeka kwemigqa ekuqaleni, maphakathi nasekugcineni kwezingaba zezinkondlo. Isahluko 6: kucutshungulwe isigqi esigqanyiswe ukwelekana kwemigqa, ukweqiwa kwawonkamisa, amalunga namagama athile aphelele. Kuhlaziywe izigaba, izindima nezikhawu ezitholakala ezinkondlweni ezikhethelwe lolu cwaningo. Isahluko 7: siqoqela ndawonye imiphumela nezincomo zocwaningo. Kuvela iziphakamiso nezinselelo okufanele zihlolisiswe ngabanye abacwaningi ekuhluzweni kwezinkondlo
- 1
- 5
- 0
- Lolu phenyo luzama ukuveza ubunkondlo obutholakala ezithakazelweni zesiZulu. Kulolu hlobo lwezinkondlo okuyizithakazelo sithola ukujiya nokusetshenziswa komqondo okunzulu.Phela izithakazelo zithathwa njengomkhuleko kuleso sibongo kanti futhi izithakazelo ziqukethe umlando wokhondolo lokuzalana kuleso sibongo. Yizona ezihlanganisa uZulu wanamuhla noZulu wayizolo. Lolu phenyo ke luyozama ukuveza ukuthi izithakazelo azisetshenziswa kuphela lapho kubingelelwana, kukhulekwa, kukhongwa noma ubonga okuthile okuphiwayo noma ubonga okuthile okwenzelwe ngulowo muntu. Kodwa lolu phenyo luyozama ukukhombisa ukuthi izithakazelo zijiyile kunalokho zinobunzulu kanye nezimpawu zobunkondlo. Yingakho lolu phenyo kufanele luzame ukuveza lobu bunkondlo nobunzulu obutholakala ezithakazelweni. Lolu phenyo luyozama futhi ukuveza ubunkondlo obukhona ezithakazelweni kumazinga ahlukahlukene. Izinga lokuqala ukuveza isakhiwo sangaphandle. Izinga lesibili ukuzama ukuveza isakhiwo sangaphakathi. Izinga lesithathu ukuzama ukuveza ubunkondlo obusezingeni eliphezulu obubonakala bukhona ezithakazelweni. Lolu phenyo luzobuye luveze izinhlobo zezithakazelo ezikhona esiZulwini. Lolu phenyo luyophethwa ngokuba lethule izihlaziyo kanye nezincomo eziyosiza abanye abahlaziyi nabacubunguli kulo mkhakha wobuciko bomlomo.
- 1
- 3
- 0